Romans 10
1Ta vivilo, eni masaxa noxilo tatila lexe Lataua upamauline'i ta Isilaeli, la utotomu ne eni akilaka noxou Lataua sou mii nesi. 2Xo eni elavusi'a manina, la avikala lamana aloxo 'o, ane'i masaxa noxi'a tatila sou imulinu masaxa noxou Lataua, ia ilamana laixe no anu masaxa noxou Lataua uasi. 3Xo ane'i ilavusou mo itongonu 'ilixo ma'ia e Lataua umulinu la sou umoxo'inge lexe nenge ta mitema telapu ne uasi, la me'a i'oxe i'oxonu no anu xavine'isi sou ixali ta mitema milapu. Mo italoxolixa'a noxou Latauasi mo imulinu masaxa noxou la sou Anu molu umoxo'a lexe ane'i ta mitema milapu uasi. 4Xo nenge telavusou lexe Kalisito mune'e la mukalusou 'ilixo sou imulimulinu lapuloto ne, mo sou ane'i imuxaxu tane'i noxou la ane'i latala ne ixali ta mitema milapu no iou Lataua.5 aXo Mosesi mukaukavunu vaivaikala sou 'ilixo ma'ia ane ta mitema imulinu la sou Lataua umoxo'a lexe ane'i ta mitema milapu. La anu muvikala aloxo 'o, “Itema e umulimulinu 'ili'ilixo sou lapuloto 'o laixe ukalusi, la anu umauli.” 6 bIa ta mitema ane mixali ta mitema milapu xo ane'i mimuxaxu tane'i noxou Lataua ne milavusou vaikala e muai aloxo ne, “Mamu sou tangengi uvikala lexe, 'ena'ei mumomomo sou ulai teitexi no opo loxotolo?” (Vaikala ane loxo ne, anu loxo ngingi ngemasaxa lexe ngalivunoxu Kalisito ulu'e.) 7Mo mamu sou ngavikala lexe “'Ena'ei umomomo sou ulai no lia no aso iou?” (Vaikala ane loxo ne, anu loxo ngingi ngemasaxa lexe ngatulusou Kalisito utulu no anu soli la ane.) 8Ia laaxu vaikala ne maninasou aloxo 'o, “Vaikala ne a muxolu 'alai no paumenge ne, mo muxolu no anangenge xe anu muxolu no tangengi.” Anu vaikala ne, ane vaikala sou lexe ngingi ngamuxaxu tangengi ne ane ngingi ngalolomusou nexi taalomengixu utotomu o. 9Lexe nini navikala lamana no anaxene no ie'i ta mitema lexe, “Iesu anu Tila.” Xe namuxaxu taneni lexe Lataua mutulusou no lulu, la Lataua upamaulineni. 10Xo nenge temuxaxu tanenge noxou la sou Lataua umoxo'inge lexe nenge ta mitema telapu, xe no anangenge tapala'alixu lexe nenge temuxaxu tanenge noxou la sou Lataua upamaulinenge. 11 cAloxo vaikala muai no nano no anu Lavuku Tavuna teinu noxou Lataua muvikala aloxo 'o, “Ta mitema e mimuxaxu tane'i noxou, la imomomo sou iulua uasi.” 12 dLa sou ta Iutaia ilo'a ane'i ane ta Iutaia uasi ne ane'i mixali vilesisi mo Anu muxali Tila noxi'a ane'i mukalusi mo Anu ualusi'a ane'i ane ilavusou i'ava sou su'uli ulai noxou. 13 eLa sou, “Ta mitema ukalusi e ilavusou ilinga sou su'uli no ualasou Tila, la Anu upamauline'i.”
14Ia lexe ane'i imuxaxu tane'i noxou uasi, la sou ane'i ilinga sou su'uli a loxovaa? Mo lexe ilomusou a'alosou uasi, la sou imuxaxu tane'i noxou a loxovaa? Mo lexe itema vile uaaloi'a uasi, la sou ane'i ilomusou a'alo ne a loxovaa? 15 fMo lexe ipalusi'a ta mitema sou ilai ia'alo uasi, la sou nexi taa'alo a loxovaa? Aloxo kaukavu muai no nano no anu Lavuku Tavuna teinu noxou Lataua muvikala aloxo 'o. “Anu laixe manina noxi'a ta mitema e sou ine'e ia'aloxu a'alo laixe noxinge.”
16 gIa ta Isilaeli tavu'alo i'osasou a'alo laixe ne uasi. Aloxo Aisaia mulemolu tei aloxo 'o, “Tila, 'ena'ei umuxaxu tanu no anu vaikala e nexi tea'aloxu ne?” 17La sou nenge telavusou lexe nenge talomusou vaikala noxou Lataua, la sou nenge tamuxaxu tanenge. Nenge talomusou a'alo ne, anu molu noxou Kalisito. 18 hIa eni atali'i aloxo, loxovaa ane'i ta Iutaia ilomusou a'alo ne uasi? Uasi, ane'i milomusou ne. Nenge telavusou lexe,
“Ta mitema no xalexalee tuatuala no lia 'o mukalusi ne milomusou xoline'i ne,
mo ta mitema mukalusi no lia 'o milomusou a'alo laixe ne.”
19 iEni atali'i la aloxo 'o, loxovaa ta Isilaeli ilavusou vaikala ne laaxu uasi? Ngingi ngexavutalanu vaikala noxou Mosesi? Anu muvikala aloxo 'o.
“Eni ano'a ta mitema no xaleenu tuala vile e ualasi'a uasi
xe mixolu mixovulaulausi, mo no anu 'ilixo e eni a'oxonu ne,
la u'oxonu opongengi masuai'a xe la'iangenge mo ngaisu.”
20 jMo Aisaia muvikala pekia'u kalumo aloxo 'o,
“Ta mitema ane ikakamulileli uasi, a ane'i mixalisilo ne.
Eni epala'alixo lamana noxi'a ane'i ane itali'itali'isilo uasi.”
21 kIa Lataua muxavutalane'i ta Isilaeli, la muvikala no anaxu Aisaia aloxo 'o.
“No voxovoxo utotomu ne eni atolosou avolo mo axomaie'i ta mitema e ilomuxu vaikala noxilo uasi,
xe ilomu sou ixiu maulixa'a uasi ne, lexe ine'e noxilo.”
Copyright information for
ATA